మంచు తెరలు తెరలుగా కురుస్తూనే ఉంది. చల్లగాలికి శరీరం చిగురుటాకులా వణుకుతోంది. మసకచీకట్లను చీల్చుకుంటూ బయటకొచ్చేందుకు ఉదయభానుడు శతవిధాలా ప్రయత్నిస్తున్నాడు. బయటకు అడుగుపెడితే గడ్డకట్టిపోతానేమోననిపిస్తున్నా... ‘ఇంత పొద్దున్నే ఏమిటే నీ గొడవ’ అని అమ్మ తిడుతున్నా... నేను మాత్రం ఊరుకుంటానా... బయటికి వెళ్లాల్సిందేనని మారం చేస్తున్నా, అమ్మ ఎంత పెద్దదైనా... నా మారం ముందు ఆమె ఎంతో చిన్నదే. ఎందుకంటే నేను బుంగమూతి పెడితే ఆమె మనసు వెన్నలా కరిగిపోతుంది. ఇంకేముంది అమ్మ నాకు తలంటింది. చక్కగా ముస్తాబు చేస్తోంది. నేను ‘తొందర తొందర’ అని గొడవ చేస్తూంటే ‘ఉండవే ఏమిటా తొందర’ అంటూ తాను మాత్రం నన్ను బుట్ట బొమ్మలా తయారు చేసింది. కానీ ఆమెకేం తెలుసు నా తొందర గరించి టీచర్‌ దగ్గరకెళ్లాలి. నిన్ననే కొనిపెట్టుకున్న గ్రీటింగ్‌ కార్డు, యాపిల్‌ పండు ఇవ్వాలి. అందరికంటే నేనే ముందుండాలి. ఆ తర్వాత ఫ్రెండ్స్‌ అందరి దగ్గరికెళ్ళాలి. వాళ్లు నన్ను కలవడానికి రాకముందే నేనే వాళ్లని కలవాలి. ఇవన్నీ ఆమెకేం తెలుసు... అందుకే అమ్మకేం తెలీదు.
ఏమిటిదంతా అంటారా?! అవును మరి ఆదునిక ప్రపంచంలో... కంప్యూటర్‌ యుగంలో... అన్నం తినడానికి కూడా ఆన్‌లైన్‌లోనే ఆర్డర్‌ ఇచ్చే కాలంలో... వున్న మనకు పై విషయం అంత తేలిగ్గా గుర్తుకు రాదు. 21వ శతాబ్దంలో... కంప్యూటర్‌ యుగంలో కాలాన్ని మర్చిపోయి కంప్యూటర్‌తో కాలం గడిపేస్తున్న నాకు కొత్త ఏడాది వస్తుందనగానే గతం ఒక్కసారిగా కళ్లముందు కదిలింది. అవును అప్పుడే సంవత్సరం గడిచిపోయింది. 365 రోజులు గిర్రున తిరిగి పోయాయి. నిన్నగాక మొన్న పోయినట్లుంది జనవరి ఒకటో తారీఖు. మళ్లీ వచ్చేసింది కొత్త ఏడాది తొలిరోజు. కాలచక్రం కంప్యూటర్‌ వేగంతో తిరుగుతోంది కదా!!అంతా కాలం మాయ. అప్పట్లో కొత్త ఏడాది వస్తుందంటే రెండు, మూడు వారాల నుండే సందడి మొదలయ్యేది. గ్రీటింగ్‌ కార్డులు అమ్మే దుకాణాలతో, పూల అంగళ్లతో అంతా కళకళలాడుతుండేది. ఆత్మీయులందరికీ నూతన సంవత్సర తొలి రోజునే శుభాక్షాంక్షలు అందజేయాలన్న ఉత్సాహంతో కార్డు కొని పోస్టు చేసేవారు. ఇక పిల్లల సందడైతే చెప్పనలవి కాకుండా వుండేది. ఉద్యోగులు అందరూ అధికారులను స్వయంగా కలుస్తూ... పండ్లు, పుష్పగుచ్చాలను అందజేసి వారి పట్ల తమ అభిమానాన్ని వ్యక్తం చేసేవారు.
ఇప్పుడేమో అంతా తారుమారు. మన మధ్యలోకి కంప్యూటర్‌ వచ్చేసింది. మనసు మధ్యలోకి సెల్‌ ఫోన్‌ చొరబడింది. శుభాకాంక్షలు చెప్పేందుకో ఆన్‌లైన్‌ గ్రీటింగ్‌ కార్డు. అభినందించేందుకో ఎస్సెమ్మెస్‌. అంతా మాయా ప్రపంచం. కార్డును కళ్లతో కంప్యూటర్‌ స్క్రీన్‌ మీద చూసుకోవడం తప్పించి దాన్ని తాకి అవతలి వారికి మనపై ఉన్న ప్రేమాభిమానాన్ని ఆస్వాదిద్దామంటే ఇప్పుడు కుదిరే పని కూడా కాదు.
కొన్నేళ్ల క్రితం వరకు...
పిల్లల్లో... పెద్దల్లో నూతన సంవత్సరం అంటే ఓ వేడుక. ఇప్పుడూ అంతకంటే ఎక్కువగానే అనుభవిస్తున్నారు. మరెంతో ఉత్సాహంతో ఉరకలెత్తే సంబరాల్లో మునిగి తేలుతున్నారు. కానీ రోజులు మారిపోయాయి. అప్పట్లోలా అభిమాన సినీనటుడి బొమ్మతో ఉన్న అర్థరూపాయి గ్రీటింగ్‌ కార్డు చేతిలో పట్టుకుని స్నేహితులందరికీ తానే ముందివ్వాలనుకుంటూ పొద్దు పొద్దున్నే వీధుల్లో తిరుగుతూ చిన్నారులు చేసే సందడి కనిపించడం లేదు. ఆత్మీయ మిత్రుడిని కలిసి కరచాలనం చేసి తన్మయత్వం పొందే అవకాశం అసలే లేదు. మనుషుల్ని దగ్గర చేసి ఒకరిపై మరొకరికి ప్రేమాభిమానులు పెంపొందేలా సమున్నత లక్ష్యాలతో జరుపుకునే వేడుక అసలు అర్థానికి దూరంగా జరిగిపోయింది.పరుగు తీయాల్సిందే...
ఇందుకు పూర్తిగా మనల్ని తప్పుబట్టేకన్నా మారుతున్న కాలంతో కంప్యూటర్‌తో పోటిపడి పరుగు తీయాల్సిన జీవితం. జీవితంలో పైకి ఎదిగేందుకు ప్రపంచ నలుమూలలకు వెళ్లక తప్పని పరిస్థితులు వెరసి మనుషుల మధ్య దూరం పెరుగుతోంది. అయితే ఆ దూరాన్ని చెరిపేయకున్నా... తగ్గించుకునేందుకు ప్రయత్నిస్తూ కంప్యూటర్‌, సెల్‌, ఇతర ఆధునిక విజ్ఞానాన్ని వినియోగించుకుంటున్న తీరు కొంతలో కొంత నమయని చెప్పుకోవచ్చు.నేటి సమాజంలో అత్యాధునిక పోకడతో కాలం వెళ్లదీస్తున్న యువత కూడా ఒకప్పుడు ఇదే కొత్త ఏడాదిని అంతరాలు మరచి ఆనందంగా జరుపుకున్న వారే. తమ చిన్ననాటికీ, ఇప్పటికీ వచ్చిన మార్పులెన్ని ఉన్నా గతాన్ని మాత్రం మరువనంటోంది యువత.
సరదాలు... సంబరాలు...
గతంలో కేవలం ప్రముఖులకే పరిమితమైన కొత్త సంవత్సరపు వేడుకలు ఒక దశాబ్దపు కాలంగా పూర్తిగా మారిపోయాయి. నగరాలలో మొత్తం మత్తులో జోగడమే. ఈ పార్టీల కల్చర్‌ ఇప్పుడు మధ్యతరగతి వారికి వ్యాపించేసింది. ప్రత్యేకంగా నిర్వహిస్తున్న కార్యక్రమాలు... థీమ్‌లు... మధురానుభూతులు యువత గుండెల్లో నిలిచిపోతున్నాయి. వీటికి తోడు అసాంఘీక కార్యక్రమాలు కూడా పెరిగిపోతున్నాయి. ఉద్వేగం... ఉత్సాహం... ఒకటే హడావుడి... కాసింత ఒత్తిడి మరో రూపంలో చెప్పాలంటే బాధ్యతల సమాహారం. తమ జీవితంలో మరో కొత్త ఏడాదిని ఆహ్వానించేందుకు సిద్ధపడటం కన్నా అదేదో ఒక ట్రెండ్‌లాగా ఫాలో అయిపోతున్నారు. ఇక 31వ తేదీ రాత్రి పది గంటలు మొదలు ఈ పార్టీల సందడి అంతా ఇంతా కాదు. ఇటీవల ఇవి మన హైదరాబాదుసహా మిగిలిన ప్రధాన నగరాల్లో బాగా విస్తరించాయి. అమ్మాయిలు సైతం ఇలాంటి పార్టీలు ఇస్తున్నారు. గల్లీ దోస్తులు, తోటి ఉద్యోగులు... ఇలా యువతరం అందర్నీ ఒక్కచోటకు చేర్చి తీపి జ్ఞాపకాలు, సరదా సన్నివేశాలను గుర్తుకు తెచ్చుకుంటూ ఆనందకేళి, ఆటపాటలతో ఆ పూట ఆనందాల్లో తేలియాడుతుంటారు.ఆట పాటలతో సమయాన్ని మరచి గడిపేయడం వీరికి తెలిసినంతగా మరెవరికీ తెలియదేమో. కొత్త సంవత్సరం అంటేనే చాలు ఎక్కడలేని హుషారుతో ఊగిపోతారు. వీరిలో ఎక్కువగా ఉన్నత స్థాయి కుటుంబాలకు చెందిన వారే కా మధ్యతరగతి యువత కూడా ఎక్కువగా పాలు పంచుకుంటారు.
ఎక్కడైనా మేముంటాం...
కుర్రాళ్ల వేడుకలు ఎక్కువగా వారి గదులు, ఫంక్షన్‌ హాళ్లు, శివారు రిసార్టులు, విల్లాలు, పబ్బుల్లోనే జరుగుతుంటాయి. డీజే సంగీత హోరులో యువతరం మైమర్చి ఆడిపాడతారు. అసలే కొత్త సంవత్సరపు వేడుకలు... పాటలు... డాన్సులు మారుమ్రోగుతున్నాయి. ఖర్చు అంటారా... వెయ్యి రూపాయల మొదలు లక్షల వరకు. సంతోషాలకు హద్దేలేదు. పిండి కొద్దీ రొట్టెలాగ ఎవరి స్థాయికి తగిన విధంగా వారు వెచ్చిస్తున్నారు. నగరాల్లో, పట్టణాల్లో 12 అయ్యిందంటే చాలు బైకులపై మద్యం తాగుతూ గోలచేస్తూ అరుస్తూ తిరగడం వీరి వేడుకలో ఒక భాగం. అమ్మాయిల పరిస్థితి మాత్రం ఇందుకు భిన్నం. ఇటువంటి వేడుకలలో ఇప్పుడిప్పుడే వీరూ పాల్గొంటున్నారు. వారి హాస్టల్స్‌... లేదా కళాశాలలు, పనిచోసే చోట్లలోనే వేడుకల్లో పాల్గొనేందుకు మక్కువ చూపిస్తున్నారు.మనకిది పాతైపోయింది...
అమెరికా, కెనడా, దక్షిణాఫ్రికా వంటి దేశాల్లో ఈ రకం పార్టీలు ఎప్పటినుంచో వున్నాయి. మనకు తొలుత నగరంలోని తారలు... ప్రముఖుల పిల్లల నుంచి మొదలైన ఈ సంస్కృతి సాధారణ యువతీ యువకుల వరకు పాకింది. వీటిని నిర్వహించేందుకు పనిగట్టుకుని కొన్ని ఈవెంట్‌ మేనేజ్‌మెంట సంస్థలు సైతం నగరంలో పనిచేస్తున్నాయి. కొత్త కొత్త ఆకర్షణీయ ప్యాకేజీలలో భాగంగా ఈ సేవలను అందిస్తున్నాయి.. రకరకాల థీమ్‌లతో పార్టీలను నిర్వహించడం వీరి ప్రత్యేకత. హవాయి థీమ్‌ అంటే కొబ్బరి చెట్లు, కొడలతో కేరళ వాతావరణం ప్రతిబింబిస్తుంది. బీచ్‌ థీమ్‌లో సముద్రపు ఒడ్డున ఉన్నట్లు భ్రమ కల్పించేస్తారు వీరు. సినీ థీమ్‌ అంటే మీకు అర్థమయిపోయే వుంటుంది. హిందీ సినిమా పోస్టర్లతో అలంకరించి మరీ అలరిస్తారు. ఎవరి అభిరుచికి తగినట్లుగా వారికి వీరు సిద్ధం చేస్తారు. వీటికి రేంజ్‌ను బట్టి 50 వేల నుండి లక్షల వరకూ వసూలు చేస్తారు. ఎవరి స్థాయిలో వారు ఈ కొత్తసంవత్సరానికి సన్నాహాలు చేసుకుంటారు.వింత పోకడలు...
గతంలో మన నగరాల్లో చోటు చేసుకుంటున్న సంఘటనలు తల్లిదండ్రుల్లో భయాందోళనలు రేకెత్తిస్తున్నాయి. గతేడాది న్యూయర్‌ వేడుకల్లో పాల్గొని తిరిగివెళ్తున్న అమ్మాయిలను ఆపి కొందరు యువకులు మద్యం మత్తులో చేసిన వింత చేష్టలకు సభ్యసమాజం నివ్వెరపోయింది. వారి వస్త్రాలను తీయించి ఫొటోలు తీసి మరీ నెట్‌లో పెట్టిన ఆ సంఘటనను ఇప్పటికీ ఏ తల్లిదండ్రులూ మర్చిపోలేరు. ఇక నగరంలో మరో చోట కారులో వెళ్తున్న వారిపై బీర్‌ బాటిల్స్‌ విసిరి, ఏంటని ప్రశ్నించిన వారిపై చేయి చేసుకున్న ఆకతాయిలపై పోలీసు కేసులు కూడా నమోదయ్యాయి. వేడుకల పేరుతో ఇటువంటి అసాంఘీక కార్యకలాపాలు కూడా కొత్త సంవత్సరపు వేడుకల్లో భాగంగా మారిపోయాయి. మరికొన్ని చోట్ల ఏటిఎం సెంటర్ల అద్దాలు పగులగొట్టి పోలీసుల చేతుల్లో తన్నులు తిన్నారు. నేడు ఇది కొత్త ఫ్యాషన్‌... వేడుకంటే ఇలాగే వుంటుంది. ఇలా వేడుకలు చేసుకునే వారంతా డబ్బున్నవారి పిల్లలే కావడం గమనార్హం.దేశాలు వేరైనా వేడుక ఒక్కటే...
ఇప్పుడు మన దగ్గర వున్న క్యాలెండరు జనవరి ఒకటవ తేదీన ప్రారంభం అవుతుంది. నిజానికి ఆంగ్లేయుల పాలన వలన మనకు సంక్రమించింది. అనంతరం కాలంలో అదే స్థిరపడిపోయింది. దీనికి ముందు మన భారతదేశంలో వుండే క్యాలెండరుకు పది మాసాలే వుండేవట. అనంతరం ఆ పది నెలలకు ముందు జనవరి, ఫిబ్రవరి నెలలను కలిపి పన్నెండు నెలతో క్యాలెండర్‌ రూపొందింది. నిజానికి మన కొత్త సంవత్సరం మార్చితో ప్రారంభం అవుతుంది.సంవత్సరం చివరి రోజైన 31వ తేదీ రాత్రి నుండి కొత్త సంవత్సరం ప్రారంభించడానికి స్వాగత సంబరాలు ప్రారంభం అవుతాయి. వివిధ రకాలైన సంగీతాలు, డాన్సులు... మిరమిట్టు గొలిపే బాణాసంచాలతో కొత్త సంవత్సరానికి ఘనంగా ఆహ్వానం అందిస్తారు. ఇక మనదేశంలోని ప్రధాన నగరాలైన ఢిల్లీ, ముంబయి, కోల్‌కత్తా, బెంగళూరు, చెనై్న మొదలైన ఇంకా ఎన్నో నగరాల్లో, పట్టణాల్లో, ఈ వేడుకలు అత్యంత అంబరాన్నంటుతాయి. మనదేశంలోపాటు చాలా దేశాల్లో న్యూయిర్‌ రోజున శెలవు దినంగా ప్రకటిస్తారు.
దేనికదే భిన్నం...
ప్రపంచ వ్యాప్తంగా ఈ న్యూయర్‌ వేడుకలు వైభవంగా జరుగుతున్నా ఎడిన్‌బర్గ్‌, సిడ్నీ టొరంటో, మాస్కో, రోమ్‌, హాంగ్‌కాంగ్‌, లండన్‌, లాస్‌ ఏంజిల్స్‌, వెనిస్‌, బెర్లిన్‌, పారిస్‌, న్యూయార్క్‌, టోక్యో, రియో డీజెనీరియెలలో మాత్రం అత్యంత వైభవంగా జరుపుకుంటారు. ఇంగ్లండ్‌, అమెరికాలలోని ఆలయాల్లో డిసెంబర్‌ 31వ తేదీ రాత్రి 11 గంటలు మొదలు విరామం లేకుండా గంటలు మోగిస్తారు. అలా సరిగ్గా పన్నెండు అయ్యే వరకు వాయిస్తారు. ఇది గడిచిన సంవత్సరానికి చెప్పే వీడ్కోలు.. అలాగే సంతోషంగా కొత్త సంవత్సరానికి చెప్పే స్వాగతం. 12 గంటలు కాగానే కొత్త సంవత్సరానికి స్వాగతం పలుకుతూ వేగంగా గంటలను మోగిస్తారు. తెల్లవారగానే ఒకరినొకరు గ్రీటింగ్స్‌ చెప్పుకుని, స్వీట్లు పంచుకుంటారు. మహిళలు ప్రత్యేక నృత్యాలు చేస్తారు. ఆరోగ్యానికి కూడా ఎంతో ప్రత్యేక స్థానాన్ని కల్పిస్తారు. ఆరోగ్యానికి మంచి చేసే ఎన్నో పదార్థాలతో విందు చేసుకుంటారు.ఇండోనేషియాలో...
ఇండోనేషియాలో అయితే అక్కడి ప్రభుత్వాలే కొత్త సంవత్సరపు వేడుకలను నిర్వహిస్తాయి. పశుపతి బ్రిడగ్జివద్ద జరిగే వేడుకలు ఎంతో ఘనంగా అట్టహాసంగా నిర్వహిస్తారు. ప్రజలు తమ కుటుంబాలతో సహా బాణాసంచా కాల్చుకుంటూ ఈ వేడుకలను ఘనంగా జరుపుకుంటారు. దీన్ని సాలుగన్‌ అని అంటారు. సంతోషానికి దీన్ని ప్రతీకగా చెబుతారు.న్యూయార్క్‌లో ఉన్న టైమ్‌ స్కే్వర్‌ భవంతిపై నుండి నీటితో నిండిన పెద్ద క్రిస్టల్‌ను 11.59 గంటల సమయంలో కిందికి జారవిడుస్తారు. అది నేలమీద పడేటప్పటికి 12 గంటలవుతుంది. వెంటనే అక్కడ వేచియున్న లక్షలాది మంది ప్రజలు హేపీ న్యూయర్‌ అంటూ గట్టిగా అరుస్తూ, కొరికొకరు శుభాకాంక్షలు తెలుపుకుంటారు. ఇలా ఈ వేడుక 100 సంవత్సరాల నుండి అక్కడ జరుగుతోంది.
ఆధ్యాత్మిక సమాహారం జపాన్‌...
జపాన్‌లో ‘ఒమిసోకా’ అంటూ నూతన సంవత్సర దేవతగా ‘తోషిమా’ని ప్రార్థిస్తారు. ఇళ్లను ప్రత్యేకంగా అలంకరించుకుంటారు. నూతన సంవత్సరానికి స్వాగతం పలికేందుకు ప్రత్యేక పూజలు నిర్వహిస్తారు. బుద్ధుని ఆలయంలోని గంటలను 108 సార్లు మోగించడం వల్ల సంవత్సరమంతా శుభం జరుగుతుందని నమ్ముతారు. అక్కడి స్థానిక టీవీల్లో అనేక కార్యక్రమాలు, పాటల పోటీలునిర్వహిస్తారు.రోమ్‌లో నూతన సంవత్సరాన్ని ‘గిఫ్ట్‌డే’ అంటారు. ఇరాన్‌లో ‘నీరో’, పశ్చిమ జర్మనీలో ‘పినిపినీ’ అనీ వేడుకలకు సిద్ధం అవుతారు. యుగస్లోవియాలో ఆర్థిక వ్యవస్థకు చిహ్నంగా కొత్త సంవత్సరపు వేడుకలను నిర్వహించుకుంటారు. ఆర్థిక వ్యవస్థకు చిహ్నం అయిన ‘నూకరం’ను వారు తప్పకుండా తాకుతారు.
రష్యాలోని ప్రజలు తమ ఇళ్లలో ‘స్కూసు’ అనే ప్రత్యేకమైన చెట్లను నాటుతారు. ఇవి క్మిస్మస్‌ చెట్లలాగే ఉంటాయి. ఇలా ఈ చెట్లను నాటడం ఎంతో అదృష్టంగా వారు భావిస్తారు. వీటి వల్ల అంతా శుభం జరుగుతందన్నది వారి నమ్మకం. రష్యాలోని మరికొన్ని ప్రాంతాల్లో కొత్త సంవత్సరం మొదటి రోజు మొదలు వారం వారం మొత్తం వరకు ఈ వేడుకలు జరుపుకుంటారు. ‚పోర్చుగల్‌లో డిసెంబర్‌ 31 అర్థరాత్రి వేళలో పాత్రలను చప్పుడు చేస్తూ లక్ష్మీదేవికి ఆహ్వానం పలుకుతారు. ఇది భారతదేశంలో దీపావళి చేసుకుంటున్నట్లే వుంటుంది.
సెల్టులనుంచి రోమన్ల వరకూ...
సెల్టిక్‌-జర్మన్‌ పురోహిత వర్గంవారు నూతన సంవత్సరం మొదలైన సందర్భంలో తమ పవిత్రమైన మొక్క మిస్ట్‌లెటో ను బహుమతిగా ఇచ్చేవారు. రోమన్లు ఇలాంటి బహుమతులను ‘స్ట్రేనే’ అనేవారు. ‘స్ట్రేనియా’ అనే అదృష్ట దేవత నుంచి ఈ పదం ఆవిర్భవించింది. మొదట శుభప్రదమైన నూతన సంవత్సరం శుభాకాంక్షలు తెలియజేస్తూ పవిత్ర వృక్షాల కొమ్మలను బహుమతులుగా ఇచ్చేవారు. తరువాత జనవరి నెల ఎవరికి పవిత్రమైన నెలో ఆ దైవం జేనస్‌ ముఖం ముద్రించి వున్న గిల్డెడ్‌ నట్స్‌, నాణాలు వంటివి బహుమతులుగా ఇచ్చేవారు. చక్రవర్తి బహుమతులిచ్చే ఆచారాన్ని రోమ్‌ కూడా పాటించింది. కానీ రోమన్‌ నియంత చక్రవర్తుల పుణ్యమా అని తదనంతర కాలంలో ఈ స్ఫూర్తి అడుగంటిపోయింది.స్కాటిష్‌, ఆంగ్లేయులు...
హెన్రీ-3 (1216-72) కాలం నుంచే ఇంగ్లీషు రాజరికం కూడా తమ ప్రజలనుంచి నూతన సంవత్సర బహుమతులు రాబట్టేది. ఇక ఎలిజెబత్‌ రాణి అయితే ‘ఎవరిస్తున్నారు? ఎమిస్తున్నారు?’ అన్నది పట్టిపట్టి గమనించేది. నూతన సంవత్సరం సందర్భంగా పెద్ద పెద్ద మొత్తాలు నగల రూపేణా, బంగారం రూపేణా రాబట్టేది. ఈ రాణిగారు ఈ పద్ధతిని క్రమబద్ధీకరించిందని చెప్పవచ్చు. అన్ని వర్గాలకు చెందిన వారు సమర్పించే బహుమతుల వివరణాత్మక జాబితాలు తయారు చేయించసాగింది. కానీ ఎలిజెబత్‌ రాణి వైభవం తర్వాత ఈ ఆచారం పతనం కానారంభించింది. చివరికి ఆలివర్‌ క్రామవెల్‌, ప్యూరిటన్లు ఆధికారంలోకి వచ్చిన తర్వాత ఈ ఆచారం నిలిపివేశారు. విక్టోరియన్‌ హయాం వరకూ కొత్తసంవత్సరం నాడు బహుమతులు ఇచ్చిపుచ్చుకునే ఆచారం ఇంగ్లీషు ప్రజల్లో సర్వసాధారణమైన ఆచారంగా కొనసాగింది. చేతితొడుగులు సర్వసాధారమైన బహుమతి.వైన్‌ను నిలవచేయడానికి, రుచిని చేకూర్చడానికి లవంగాలు గుచ్చిన కమలాలు కూడా ప్రజాదరణ పొందిన బహుమతిగా ఉంటూ వచ్చింది. ఇంగ్లీషువారు అమెరికాకు వచ్చి ిస్థిరపడినపుడు కొత్త సంవత్సరం నాడు బహుమతులు ఇచ్చిపుచ్చుకునే ఆచారాన్ని తమ వెంట తీసుకువెళ్ళారు. ఫ్రెంచువారు కూడా ఈ ఆచారాన్ని పాటించారు. ఫ్రెంచివారు అధికసంఖ్యలో ఉండే న్యూ ఆర్లియన్స్‌లో చాలాకాలం వరకూ బహుమతుల ఆచారం కొనసాగింది. ఫ్రాన్సులో ఈనాటికీ నూతన సంవత్సరం సందర్భంగా బహుమతులు గ్రీటింగ్‌ కార్డులు ఇచ్చిపుచ్చుకుంటారు. కొత్త సంవత్సరం అత్యంత భారీస్థాయి వేడుకైన స్కాట్‌ల్యాండ్‌లో పిల్లలు గుంపులు గుంపులుగా ఇంటింటికీ వెళ్ళి పాటలు పాడతూ డబ్బు, ఆహారం భిక్ష కోరుతారు. ‘ఐ విష్‌ యు మెర్రీ క్రిస్మస్‌, హ్యాపీ న్యూ ఇయర్‌’ అని శుభాకాంక్షలు తెలియజేస్తారు.
భారతదేశంలో కొత్త ఏడాది...
హిందూ క్యాలెండర్‌ ప్రకారం సూర్యుడు మేషరాశిలోకి ప్రవేశించినపుడు కొత్త సంవత్సరానికి స్వాగతం పలుకుతాం. అంటే చైత్ర మాసంలో మనకు కొత్త సంవత్సరం ప్రారంభమవుతుంది. దాన్నే సంవత్సరాది, యుగాది లేక ఉగాది అని ఎన్నో పేర్లతో పిలుచుకుంటాం కూడా. ఈ రోజున పెద్దల ఆశీర్వాదంతో మొదలయ్యే వేడుకలు ఒకరికి ఒకరు బహుమతులు ఇచ్చిపుచ్చుకుని సంబరాలు చేసుకుంటారు. పంచాంగ శ్రవణం వంటివి ఈ రోజున తప్పనిసరి. కానీ ఇందులోనూ ఆధునిక పోకడలు చోటు చేసుకుంటున్నాయి. ఉగాదిని కేవలం ఓ పండుగలాగే చేసుకుంటున్నారు. జనవరి ఒకటినే ఎక్కువ శాతం సంవత్సరం మొదలుగా పాటిస్తూ, వేడుకలు చేసుకోవడం ఎక్కువైంది.భిన్న సంస్కృతుల నిలయం...
అందుకే ఇక్కడ ఎవరికి తోచిన విధంగా వారు వేడుకలను నిర్వహించుకోవడం ఆనవాయితీగా వస్తోంది. మన దేశంలో ముఖ్యంగా చెప్పుకోదగినది గోవాలో జరిగే న్యూయర్‌ వేడుకలు. ఇవి ఎంతో అట్టహాసంగా జరుపుకుంటారు. సముద్ర తీరంలో జరిగే ఈ వేడుకలను చూడడం ఒక గొప్ప అనుభూతిగా వర్ణిస్తారు చూసి వచ్చినవారు. ఢిల్లీ, బెంగుళూరు, చెనై్న హైదరాబాద్‌, ఇంకా ఎన్నెన్నో పట్టణణాల్లో, నగరాల్లో డిసెంబరు 31 రాత్రి నుండి యువతీయువకులు శుభాక్షాంకలు తెలుపుకోవడం, బహుమతులు ఇచ్చిపుచ్చుకోవడం, పార్టీలు చేసుకోవడం మొదలెట్టేస్తారు. నృత్యం... సంగీతం ఇందులో ఎంతో ప్రత్యేకతను కలిగి వుంటుంది.నవవసంతం ఒక కొత్త ‘బహుమానం’...
కొత్త సంవత్సరం సందర్భంగా బహుమతు లిచ్చే సంప్రదాయం చరిత్రకందని కాలంలోనే మొదలైనట్లు తెలుస్తోంది. క్రిస్మస్‌ బహుమ తుల సంస్కృతే కాక ఫ్రాన్స్‌, స్విట్జర్లాండ్‌, రష్యా, గ్రీస్‌ సహా యూరప్‌లో అనేక ప్రాంతాల్లో కొత్త సంవత్సరం నాడు బహు మానా లిచ్చే ఆచారం ఉంది. క్రీస్తుకు పూర్వ మే యూరోప్‌లో ఇది ప్రాచుర్యంలో ఉన్నట్లు తెలుస్తోంది. ఈనాడు అమెరికాలో కొత్త సంవత్సరం కంటే క్రిస్మస్‌కే బహుమానాలిచ్చే సంప్రదాయం ఎక్కువగా వుంది. చారిత్రకం గా చూస్తే ఇక్కడి జెర్మన్‌ డచ్‌ సెట్లర్ల పాత ఆచారాల్లో దీని మూలాలున్నాయి. ఇంగ్లీషు, ఫ్రెంచి ప్రాభవమున్న రాష్ట్రాల్లో కొత్త సంవత్స రంనాడు బహుమతులు ఇచ్చే ఆచారం నేటికీ కొనసాగుతోంది. కానీ, జర్మన్‌ డచ్‌ ప్రభా వాలు కలిసి పనిచేసినందువల్ల కాల ప్రవా హం లో పాత సంప్రదాయం తుడిచిపెట్టు కు పోయి అమెరికా అంతటా ఇప్పుడున్న సంప్రదాయం వచ్చి స్థిరపడింది. జనవరి 1న లౌకికవాద నూతన సంవత్సరంగా ప్రపంచం గుర్తించే చాలాకాలం పూర్వమే ప్రపంచంలో వివిధ దేశాల ప్రజలు వివిధ నూతన సంవత్స రాల కాలం కలిగి ఉన్నట్లు తెలుస్తోంది. వారి విభిన్న నూతన సంవత్సరాల్లో కూడా ఓ విధమైన ఏకత్వం వున్నట్లు తెలుస్తోంది. బహుమతులు విందులు సాంఘిక వేడుకలు ఈ ఏకత్వాన్ని సూచించే కొన్ని ప్రధాన ఆచా రాలుగా ఉన్నాయి. నూతన సంవత్సరం రావడాన్ని పురస్కరించుకుని శుభప్రదంగా భావిం చి ఒకరికొకరు శుభాకాంక్షలు తెలుపుకో వడం బహుశా ఈ సంప్రదాయానికి ప్రోద్బలంగా ఉంది.కొత్త ఏడాదిని కొత్తగా ప్రారంభించాలి...
కొత్త ఏడాది మొత్తం మంచి జరగాలి. రాష్ట్రం ఎదుర్కొంటున్న సమస్యలన్నీ తీరిపోవాలి. అలాగే ఎప్పుడూ పాతగా కాకుండా కాస్త కొత్తగా ఆలో చించండి. గొడవపడే విషయంలో కూడా అప్పుడు ఇలా జరిగింది... ఇప్పుడు ఇలా జరిగింది అని కాకుండా కొత్తగా ప్రయత్నించండి. ప్రతి విషయాన్ని కొత్తగా ఆహ్వానించండి. సరదాలు... సంబరాలు కాదు శాంతి కావాలి. ఎన్ని వున్నా... ఎన్ని వేడుకలు చేసుకున్నా మనసులలో శాంతి లేకుండా ఏదీ సాధించలేం. కాబట్టి జీవితానికి జ్ఞానం, ధ్యానం ఎంతో ముఖ్యం. ఇందుకు మార్గాలను అన్వేషించాలి. కొత్తగా వుండాలి. ఈ ఏడాది మొత్తం అందరికీ మంచి జరగాలి. ముందుకెళ్లేందుకు అందుకు కృషి చేయాలి. - శ్రీ శ్రీ రవిశంకర్‌, ఆర్ట్‌ ఆఫ్‌ లివింగ్‌ వ్యవస్థాపకులు
ఎంతో ఆనందం...
మా వీధిలో పిల్లలం, పెద్దలం అందరం కలిసి మా ఇంటిపైనే కొత్త సంవత్సరం ముందు రోజు రాత్రి వేడుకలు చేసుకుంటాం. పది గంటల నుండి మొదలు రాత్రి పన్నెండుకు ఒక నిమిషం మందు వరకు అందరం డాన్స్‌ చేస్తాం. పెద్దవాళ్లందరూ కూర్చుని మమ్మల్ని ఎంతో ఎంకరేజ్‌ చేస్తారు. పన్నెండు అయిందంటే చాలు అందరం గట్టిగా ఒక్కసారి హేపీ న్యూ ఇయర్‌ అంటూ గట్టిగా అరిచేస్తారు. అందరం విషెస్‌ చెప్పుకున్న తరువాత తిరిగి సంతోషంతో మా కార్యక్రమాలు మొదలు పెడతాం. పాటలు, డాన్సులతో ఎంతో ఎంజాయ్‌ చేస్తాం. ఉదయాన్నే మిగిలిన స్నేహితులకు ఫోన్‌ చేసి విష్‌ చేస్తాం. ఎందుకంటే ఇప్పుడు స్నేహితులంతా ఒక్కోచోట వుండరు. అందరినీ కలవడం అంటే కుదరదు.- క్రాంతి, నల్గొండ
ఆధ్మాత్మికతతో నిండాలి...
కొత్త ఏడాది అంటే నాకు వేడుకల కన్నా ముందు లక్ష్యాలు గుర్తొస్తాయి. అప్పుడే ఓ ఏడాది గడిచిపోయిందా అని అనిపిస్తుంది. అయినా ఆ రోజు మాత్రం ఆనందంగా గడుపుతాను. ఇప్పుడు వచ్చే ఏడాది మాత్రం నాకు చాలా ముఖ్యం. నా సివిల్స్‌ ప్రయత్నాలు ఈ ఏడాదితోనే ప్రారంభించాను కాబట్టి. ఇక మిగిలిన వాటిని పక్కన పెట్టాలని నిర్ణయించుకున్నా. నాలాగే ప్రతి ఒక్కరు మంచి లక్ష్యంతో మందుకెళ్లాలని కోరుకుంటున్నా. తెలంగాణ సమస్యలు... ప్రత్యేక రాష్ట్రాలు... ధర్నాలు... రైతుల ఆత్మహత్యలు వంటివాటన్నిటికీ కొత్త సంవత్సరంలో మంచి పరిష్కారం దొరకాలి. ప్రపంచంలో అందరికీ కూడా ఈ ఏడాది ఎంతో హాయిగా వుండాలని కోరుకుంటున్నాను.- టి.సుష్మారెడ్డి, సివిల్స్‌ స్టూడెంట్‌, హైదరాబాద్‌
మంచి జరగాలి...
నాకు కొత్త సంవత్సరం అంటే ఓ పండుగలాగే అనిపిస్తుంది. ప్రతి ఏడాది దీన్ని మా స్నేహితులతో కలిసి ఎంతో ఆనందంగా ఎంజాయ్‌ చేస్తాం. ఈ సంవత్సరం కూడా ప్లాన్‌ చేసుకుంటున్నాం. కానీ ప్రతి ఏడాదిలా కాకుండా ఇప్పుడు కాస్త కొత్తగా వుండాలని కోరుకుంటున్నాం. ఎందుకంటే బాధ్యతలు, సమస్యలు అన్నీ తెలుస్తున్నాయి. అందుకే ఏదైనా మంచి పని చేయాలని అనుకుంటున్నాం. మేము సరదాలకు ఖర్చు పెట్టే మొత్తంలో కొంత భాగాన్ని సమాజసేవలో వినియోగించాలని నిర్ణయించుకున్నాం. అందుకే దాని కోసం ప్లాన్‌ చేసుకుంటున్నాం.- వి.గిరిసౌమ్య, బ్యాంక్‌ కోచింగ్‌ విద్యార్థిని
ఇప్పటికీ... నాది అదే తీరు...
హాయ్‌.. నాపేరు జమాల్‌ బాషా. ప్రతి సంవత్సరంలాగే ఈ సంవత్సరం కూడా 31వ తేదీ రాత్రి సెలబ్రేట్‌ చేసుకుంటాను. ఇప్పుడు కొంత మార్పు. ఎందుకంటే ఉద్యోగం చేస్తున్నాను. బయటకి వెళ్లడానికి కుదరదు. కానీ ఉదయాన్నే అంతా మామూలే. ముందుగా నా గర్ల్‌ఫ్రెండ్స్‌కి శుభాకాంక్షలు చెబుతాను. ఎందుకంటే అబ్బాయిలు ఎప్పుడైనా కలుస్తారు. అమ్మాయిలు అలా కాదు కదా! అందుకే. తరువాత నా ఫ్రెండ్స్‌తో కలిసి బయటకు వెళ్తాను. ఇదంతా ఎందుకు చెబుతున్నానంటే... ఇప్పుడు చాలామంది ఇలా లేరు. ఎస్‌.ఎం.ఎస్‌తో వాళ్ల న్యూ ఇయర్‌ అయిపోతుంది. ఇంతకుముందు గ్రీటింగ్‌ కార్డులు ఇచ్చుకునేవారు. దూరంగా వున్న వాళ్లకు కొరియర్‌ చేసేవాళ్లు. ఇది అంతర్జాతీయ స్థాయిలో జరిగేది. కానీ ఇప్పుడంత లేదు. మెయిల్‌... లేదా ఎస్‌ఎంఎస్‌... మరీ అయితే ఫోన్‌ కాల్‌ అంతే. నేను స్కూల్‌లో వున్నప్పుడు కార్డులు చేతబట్టుకుని ఉపాధ్యాయులకు కూడా ఇచ్చేవాళ్లం. ఫ్రెండ్స్‌కి పంచేవాళ్లం. ఇక ఇంటర్‌లో అయితే జనవరి ఒకటి అంటేనే కేక పుట్టించేవాళ్లం. ఆ రోజంతా అమ్మాయిలం, అబ్బాయిలం అందరం కలిసి సినిమాలకు వెళ్ళేవాళ్లం. లేదా ఏక్కడికైనా మంచి ప్లేస్‌ ఎంచుకుని అక్కడికి వెళ్లివచ్చేవాళ్లం. నా దృష్టిలో కొత్త సంవత్సరం వేడుక అంటే అందమైన పూలతో... మరో జీవితానికి స్వాగతం పలకడం... అందుకే ఆ రోజును వీలైనంత వరకు ఆనందంగా గడుపుతాను. - జమాల్‌ బాషా, డోన్‌- హైమ సింగతల
No comments:
Post a Comment